Քաղաքացիական ակտիվիստ Էդուարդ Հայրումյանն այսօր տեսանյութ էր հրապարակել ասելով, որ Նոր Նորք վարչական շրջանի 5-րդ զանգվածի Սուրբ Սարգիս եկեղեցու լանջի 100-ից ավելի ծառ է հատվել։ «Պատճառաբանել են դա նրանով, որ այստեղ պետք է անտառ հիմնեն։ Այո՛, այո՛, առողջ ու կանաչ 100-ից ավել ծառերը հատել են, որպեսզի անտառ հիմնեն»,-ասել է նա։

Shabat.news-ի հետ զրույցում «Կանաչապատում և շրջակա միջավայրի պահպանության» ՀՈԱԿ-ի տնօրեն Արմեն Բեգոյանն ասաց, որ ծառեր տվյալ հատվածում հատվել են, սակայն ակտիվիստի նշած թվերն իրականությանը չեն համապատասխանում։
«Կանաչապատման մասով Էդուարդ Հայրումյանն այսքան ժամանակ ինչ ասել է հիմնականում եղել են կեղծիքներ։ Հիմա էլ հերթական կեղծիքն է տարածել»,- ասաց Բեգոյանը։

Նրա խոսքով՝ նշված հատվածում 5-ից 6 հեկտար տարածքի վրա հաջորդ շաբաթ իրականացվելու են ծառատնկման աշխատանքներ։ «Հիմնվելու է քաղաքային նոր անտառ, տնկվելու է 1000-ից 2000 ծառ։ Երևանի քաղաքապետարանը եկեղեցու տարածքում իրականացրել է շինարարական աշխատանքներ, բարեկարգել է, աստիճանավանդակներով կասկադ է ստեղծել, ջրավազաններ, և տարածքում առկա են եղել թվով 23 հիվանդ չորացած և փտած ծառեր, սանիտարական մաքրման աշխատանքներով դրանք հեռացվել են տարածքից։ Առողջ ծառերը պահպանվել են»։

Բեգոյանն ի պատասխան բոլոր նրանց, ովքեր դժգոհ են կանաչապատման աշխատանքներից, վաստահեցրեց, որ կանաչ գոտու վերականգնման աշխատնաքները շարունակվելու են։ «Երևան քաղաքի կանաչ զանգվածներն ավելանալու են, իրենք ուզե՞ն դա, թե՞ չուզեն»,- եզրափակեց ՀՈԱԿ-ի տնօրենը։