Թուրքիան պատրաստ է հանձնառություն ստանձնել Ուկրաինայում հնարավոր հրադադարի պահպանման համար, շաբաթ օրը «կամավորների կոալիցիայի» և Կիևի գործընկերների միջև հեռախոսազրույցի ժամանակ հայտարարել է Թուրքիայի արտգործնախարարը, հաղորդում է Reuters-ը՝ հղում անելով Թուրքիայի արտգործնախարարության աղբյուրին։

Մեծ Բրիտանիայի, Ֆրանսիայի, Գերմանիայի, Լեհաստանի՝ այսպես կոչված «կամավորների կոալիցիայի» և Ուկրաինայի առաջնորդները շաբաթ օրը հանդիպեցին Կիևում։

Մայիսի 12-ին նրանք համաձայնեցին անվերապահ 30-օրյա հրադադարի՝ ԱՄՆ նախագահ Դոնալդ Թրամփի աջակցությամբ, սպառնալով նախագահ Վլադիմիր Պուտինին նոր «մեծածավալ» պատժամիջոցներով, եթե նա չհետևի պայմաններին։

Թուրքիայի արտաքին գործերի նախարարը միացել է կոալիցիային և ընդգծել է Թուրքիայի հավատարմությունը Ուկրաինայի տարածքային ամբողջականությանը, հայտնել է Թուրքիայի արտաքին գործերի նախարարության աղբյուրը։

Աղբյուրը նաև նշել է, որ Ֆիդանը հայտնել է Անկարայի աջակցությունն անվերապահ հրադադարի հասնելու ջանքերին և հավելել, որ Թուրքիան պատրաստ է պարտավորվել պահպանել Ուկրաինայում հրադադարը, եթե այն հաստատվի։

ՆԱՏՕ-ի անդամ Թուրքիան ջերմ հարաբերություններ է պահպանել թե՛ Կիևի, թե՛ Մոսկվայի հետ 2022 թվականին Ուկրաինայում պատերազմի սկսվելուց ի վեր։ Թուրքիան աջակցում է Ուկրաինայի տարածքային ամբողջականությանը և ռազմական օգնություն է ցուցաբերում նրան, միաժամանակ դեմ լինելով Ռուսաստանի դեմ պատժամիջոցներին։

Մարտին Թուրքիայի պաշտպանության նախարարությունը հայտարարեց, որ կարող է ներդրում ունենալ Ուկրաինայում հնարավոր խաղաղապահ առաքելության մեջ, եթե Ուկրաինայի և Ռուսաստանի միջև հայտարարվի հրադադար։

Անցյալ ամիս Ուկրաինայի, Մեծ Բրիտանիայի, Ֆրանսիայի և Թուրքիայի զինվորական պաշտոնյաները հանդիպեցին Թուրքիայում՝ քննարկելու Սև ծովում անվտանգությունը՝ Ուկրաինայի և Ռուսաստանի միջև հնարավոր հրադադարի համաձայնագրից հետո։