Ֆրանսիայի նախագահ Էմանուել Մակրոնը կդառնա առաջին օտարերկրյա պետության ղեկավարը, որը կայցելի Գրենլանդիա՝ անվտանգության հարցեր քննարկելու համար ԱՄՆ նախագահ Դոնալդ Թրամփի՝ դանիական կղզին Միացյալ Նահանգներին միացնելու ցանկության մասին հայտարարություններից հետո:

Այս մասին ըստ Ria.ru-ի, հաղորդել է BFMTV-ն՝ հղում անելով Ելիսեյան պալատին։

«Ֆրանսիայի նախագահը կլինի առաջին օտարերկրյա պետության ղեկավարը, որը կայցելի տարածաշրջան ԱՄՆ նախագահի կողմից անեքսիայի սպառնալիքից հետո:

Երեք առաջնորդները (Մակրոն, Դանիայի վարչապետ Մետտե Ֆրեդերիկսեն և Գրենլանդիայի վարչապետ Յենս-Ֆրեդերիկ Նիլսեն - խմբ.) կքննարկեն անվտանգությունը Հյուսիսատլանտյան օվկիանոսում և Արկտիկայում»,- հաղորդում է հեռուստաալիքը:

Նշվում է, որ պաշտոնական այցը կկայանա հունիսի 15-ին՝ Գրենլանդիայի և Դանիայի վարչապետների հրավերով։

Տարածաշրջանի անվտանգության հարցերից բացի, քաղաքական գործիչները կքննարկեն կլիմայի փոփոխությունը, էներգետիկ անցումը և անհրաժեշտ հանքանյութերի մատակարարման անվտանգությունը։

«Այցի նպատակն է ամրապնդել Գրենլանդիայի հետ համագործակցությունը վերոնշյալ ոլորտներում, ինչպես նաև ամրապնդել եվրոպական ինքնիշխանությունը»,- հայտնել է Ելիսեյան պալատը։