Հունիսի 19-ին Բաքվում ավարտվել է շուրջ մեկ տարի առաջ «Իրանից թմրանյութերի ներմուծման և տարածման, ինչպես նաեւ կիբերհանցավորության միջոցով 98 հազար մանաթ յուրացնելու» կասկածանքով ձերբակալված՝ ՌԴ մի խումբ քաղաքացիների դատավարությունը։ Այդ մասին հայտնել է «Կոմերսանտը»՝ հղելով ադրբեջանական minval.az կայքին։ ՌԴ քաղաքացիներ Սերգեյ Սոֆրոնովը, Անտոն Դաչևը, Դմիտրի Բեզուգլին և Վալերի Դուլովը դատապարտվել են չորս, իսկ Դմիտրի Ֆյոդորովը, Բորիս Տիմոշովը, Ալեքսեյ Վասիլչենկոն և Իլյա Բեզուգլին՝ երեք տարվա ազատազրկման։

Ռուսաստանի քաղաքացիները Բաքվում բնակվել են վարձակալած բնակարաններում, հանդիսացել են ՌԴ-ում գրանցված՝ համակարգչային ծրագրավորմամբ զբաղվող ընկերության աշխատակիցներ։ Ադրբեջանի ոստիկանությունը նրանց բերման է ենթարկել ուժի գործադրմամբ։ Տարածված տեսանյութերը վկայել են, որ ձերբակալվածների դեմքերին կան կապտուկներ, արյան հետքեր, իսկ մեկի ճակատին առկա է եղել բաց վերք։

Այդ զանգվածային ձերբակալությունը և մեղադրանքի առաջադրումը հաջորդել է ՌԴ Քննչական կոմիտեի և ոստիկանության հատուկ նշանակության աշխատակիցների կողմից Եկատերինբուրգում էթնիկ ադրբեջանցիների ձերբակալությանը, որի ընթացքում երկու մարդ մահացել է։ Ըստ պաշտոնական վարկածի, նրանից մեկի մոտ «արձանագրվել է սրտի կանգ»։ Ադրբեջանական կողմը պնդել է, որ «երկու մարդ մահացել է դաժան ծեծի հետևանքով»։

Բաքվի իշխանական մամուլը հատկապես կարևորել է ՌԴ Քննչական կոմիտեի ձևակերպումը, որ «վնասազերծվել է էթնիկ հանցավոր խումբ»։ Ադրբեջանական կողմը այդ որակումը համարել է «ազգային խտրականության դրսևորում»։ Պաշտոնական Բաքուն գլխավոր դատախազության միջոցով նախապես պահանջել է, որ Եկատերինբուրգի գործի քննությանը ներգրավվեն նաև Ադրբեջանի դատախազության քննիչները, բայց Մոսկվայից ստացել է մերժում։

Բաքվում դատապարտված ՌԴ քաղաքացիների իրավունքների պաշտպանության հարցում Մոսկվայի հրապարակային դիրքորոշումը հայտնի չէ։ Ադրբեջանական մամուլում տեսակետ է տարածվել, որ Ռուսաստանում նրանք «ճանաչված են որպես զինապարտությունից խուսափածներ»։ Ըստ երևույթին, այդ տեղեկությունը որաշակի հիմք ունի։ ՌԴ ԱԳՆ-ն դեռևս Ռուսաստանի ութ քաղաքացիների նկատմամբ ադրբեջանական դատարանի կայացրած որոշմանը չի անդրադարձել։ Կարելի է ենթադրել, որ նրանց հարցը Մոսկվան և Բաքուն կքննարկեն «փակ խողովակներով»։ Եկատերինբուրգի գործով կալանավորվածները դատապարտվել են երկարաժամկետ ազատազրկման, դատարանը նրանց ներկայացված մեղադրանքը, այն է՝ մարդասպանության պատվեր և իրականացում, ապացուցված է ճանաչել։ Այդ հանգամանքը հաշվի առնելով՝ հազիվ թե կողմերը հանգեն դատապարտյալների փոխանակման։