Մայր Աթոռ Սուրբ Էջմիածինը հայտարարություն է տարածել Բաքվի ռազմական դատարանի կողմից Արցախի ռազմաքաղաքական ղեկավարության նկատմամբ կայացված՝ ցմահ կամ 20 տարի ժամկետով ազատազրկման վերաբերյալ։

Հայտարարությունում նշվում է, որ Սուրբ Էջմիածինը խոր ցավով է տեղեկացել ապօրինաբար պահվող հայ գերիների նկատմամբ կայացված ակնհայտ շինծու դատավճիռների մասին։

Մայր Աթոռը վերահաստատել է իր հանձնառությունը՝ աշխարհասփյուռ իր կառույցների միջոցով շարունակելու հետևողական ջանքեր գործադրել միջազգային և միջեկեղեցական հարթակներում՝ գերեվարված հայորդիների ազատ արձակման և Հայրենիք վերադարձի ուղղությամբ։

Սուրբ Էջմիածինը իր զորակցությունն է հայտնել Արցախի պատանդառված պետական գործիչներին, ռազմագերիներին և նրանց ընտանիքներին։