Shabat.news-ին ահազանգած քաղաքացիներից մեկը, ում երեխան արդեն մի քանի տարի է շաքարախտով հիվանդ է, դժգոհ է պետության կողմից տրամադրվող դեղերից՝ ինսուլինից, քանի որ իր պնդմամբ՝ դրանց որակն ընկել է և ծնողներից շատերը ստիպված դեղերն այլ քաղաքներից են պատվիրում։

«Մեզ տրամադրում են դեղեր, որոնք երեխաներին չեն օգնում, անորակ են, երեխաների շաքարը չի իջնում։ Ստիպված այլ քաղաքներից ենք պատվիրում, որպեսզի վստահ լինենք, որ երեխաները նորմալ դեղեր են ընդունում, բայց վստահաբար ասում եմ, որ շատ երեխաների ծնողներ պատվիրելու հնարավորություն չունեն»,- ասաց նա։

Քաղաքացին պատմեց, որ օրերս ծնողները Առողջապահության նախարարությունում հանդիպում են ունեցել, որի ժամանակ նրանց առաջարկվել է հաշմադամության կարգը հանել, իսկ դրան փոխարեն իրենց կտրամադրվի գլյուկոմետրեր, ինչը սակայն արժե 15.000-ից մինչև 30.000 հազար դրամ։ 

Shabat.news-ը թեմայի շուրջ զրուցեց «Առողջության իրավունք» ՀԿ նախագահ Անուշ Պողոսյան հետ, ով ասաց, որ վերջին շրջանում բազմաթիվ են դեղորայքների որակների հետ կապված գանգատները․ «Հաշվի առնելով, որ ինսուլինը սպիտակուց է, տեղափոխան ժամանակ կարող է լինել ջերմային ռեժիմի խախտման դեպքեր, որի արդյունքում տեղի են ունենում որակային փոփոխություններ։ Ոչ միայն երեխաների ծնողներն են բողոքում, այլ նաև ինսուլին կախյալ հիվանդներն են դժգոհում դեղերի որակից։ Այսինքն դեղի ներարկումից հետո շաքարը չի իջնում։ Պետք է առողջապահության նախարարությունը կատարի փորձագիտություն, հասկանալու համար, թե որտեղ է թերանում, պետք է ականջալուր լինեն ծնողներին և հիվանդներին»,- ասաց Պողոսյանը։

Նրա խոսքով՝ այս պահին Հայաստանում 0-ից 18 տարեկան, 800-ից 900 երեխա ստանում է ինսուլին, և ըստ Առողջապահության նախարարության, դա ապրելակերպ է և դրա համար հաշմադամության թոշակ ստանալու կարիք չկա։

«Երբ իրենք ասում են, որ դա ապրելակերպ է և հանում են երեխաների հաշմադամության թոշակը, միայն դրանով զրկվում են պլանային հետազոտություններից, բուժումից, ժամանակին նաև առողջարանային բուժում կար, հիմա դա էլ չկա։ Այսինքն ինչ է ստացվում, մինչև 18 տարեկան երեխաներին ծնողները հետևողական են եղել, բարդությունները կանխել են, իսկ 18-ից հետո մեր պետությունն այնպիսի պայմաններ է ստեղծում, որ երեխաների մոտ շաքարային դիաբետի բարդությունները զարգանան և հաշմանդամ դառնան։ Երկրի այն քաղաքականությունը, որ պետք է հաշմադամությունը նվազեցնել այստեղ հակառակն է արվում։ Եվ փոխարինել հաշմադամության կարգը գլյուկոմետրներով դա ուղղակի անհեթեթություն է, պետությունը ի վիճակի է 800 երեխայի ապահովել դրանցով»,- եզրափակեց Անուշ Պողոսյանը։