Վերջին մի քանի շաբաթների ընթացքում մամուլն անընդհատ անդրադառնում է Գյումրու նախկին քաղաքապետի և իր ընտանիքի շուրջ ծավալվող խոսակցություններին: Եվ պատահական չէ, որ հենց սահմանադրական  բարեփոխումների ֆոնին է Վարդան Ղուկասյանը մեծ ակտիվություն ցուցաբերում:

Սահմանադրական բարեփոխումների վերաբերյալ Ղուկասյանն ասել էր.  «Եթե միասեռականություն չկա, ես կողմ եմ, «այո» եմ ասում:

«Ժողովուրդ» թերթի  հրապարակած հոդվածի համաձայն՝ Գյումրիում սահմանադրական փոփոխությունների համար անհրաժեշտ թվով այո-ներ ապահովելու նպատակով տեղի իշխանական վերնախավն արդեն «աշխատանքի բաժանում» Է իրականացրել։ Եվ տեղեկությունների համաձայն տեղամասներից երկուսը «բաժին» է հասել նաև նախկին քաղաքապետ Վարդան Ղուկասյանին:

«Ես նման բաներով չեմ զբաղվում, ընդհանրապես ես քաղաքականությամբ չեմ զբաղվում, խնդրում եմ, ինձ էդպիսի հարցրեր չտաք»,-Shabat.am-ի հետ զրույցում ասաց նախկին քաղաքապետը:

Նա նաև չպտասխանեց այն հարցին, թե  եկող տարի անցկացվելիք քաղաքապետի ընտրություններում առաջադրվելո՞ւ է, թե՝ ոչ:  

Չնայած Ղուկասյանը պնդում է, որ քաղաքականությամբ չի զբաղվում, բայց մամուլի հրապարակումները վկայում են, որ Ղուկասյանի PR-ով զբաղվողները, համենայնդեպս փորձում են լավ աշխատել, որպեսզի նրա աստղը չմարի: Չի բացառվում, որ անհրաժեշտ այո-ներ ապահովելուց և իրեն արդարացնելուց հետո Ղուկասյանը կրկին  կվերադառնա իր պաշտոնին: